PayPal Mafia технология нарығын қалай өзгертті?

2002 жылы eBay компаниясы PayPal-ды 1,5 млрд долларға сатып алды. Мәміледен кейін компания командасы тарап, әркім өз жобасын бастауға кірісті. Алайда дәл PayPal сатылғаннан кейін Кремний алқабының феноменіне айналған оқиға бастау алды.

PayPal-дың бұрынғы қызметкерлері өз компанияларын құрып, стартаптарға инвестиция сала бастады және бір-біріне жаңа жобаларды іске қосуға көмектесті. Осылайша, ортақ жұмыс тәжірибесі біріктірген кәсіпкерлер мен инвесторлардың бейресми желісі PayPal Mafia пайда болды. Бұл атау 2007 жылы Fortune журналындағы мақаладан кейін кеңінен танымал болды.

Бір командадан шыққан ондаған ірі компания
PayPal Mafia құрамында технология әлеміне ықпал еткен көптеген танымал кәсіпкерлер бар.

Илон Маск PayPal-дан кейін Tesla-ны дамытуға белсенді қатысып, SpaceX компаниясын құрды.

PayPal негізін қалаушылардың бірі Питер Тиль Palantir мен Founders Fund-ты бірге құрды. Сонымен қатар, ол — Facebook-тың алғашқы инвесторларының бірі.

Рид Хоффман LinkedIn негізін қалады.

Макс Левчин кейін Affirm компаниясын құрды.

Дэвид Сакс Yammer компаниясын іске қосты. Кейін оны Microsoft сатып алды.

Ал PayPal-дың бұрынғы қызметкерлері Стив Чен, Чад Херли және Джавед Карим YouTube-ты құрды.

Джереми Стопплман мен Рассел Симмонс болса Yelp компаниясының негізін қалады.

Фото: Robyn Twomey, Fortune.com

PayPal Mafia феноменінің ерекшелігі — оның мүшелері кәсіпкер болып қана қоймай, кейін инвестор ретінде де үлкен рөл атқарды.

Олар венчурлық қорлар құрып, әлемдегі ең ірі технологиялық компаниялардың бірқатарына инвестиция салды. Олардың инвестициялары арасында Facebook, Uber, Airbnb, Stripe, Pinterest және басқа да ірі жобалар болды.

Осылайша, PayPal айналасында бір компаниядан әлдеқайда ауқымды экожүйе қалыптасты.

Бірі жаңа стартаптың негізін қалады. Екіншісі оған инвестиция салды. Үшіншісі бұрынғы әріптесін жаңа командасына шақырды. Нәтижесінде PayPal-да бірге жұмыс істеген адамдардың кәсіби байланыстары жаңа компаниялар мен жаңа бизнес-модельдердің пайда болуына ықпал етті.

PayPal Mafia-ның басты жетістігі неде?
PayPal Mafia феномені ондаған табысты компанияның құрылуымен ғана қызықты емес.

Ең маңыздысы, бір компанияның айналасында қалыптасқан команда кейін тұтас бір кәсіпкерлер буынын қалыптастырды. Олар PayPal-дағы ортақ жобасы аяқталғаннан кейін де бір-бірімен байланысын үзбей, жаңа компаниялар құрып, инвестиция салып, технология нарығына ықпал ете берді.

Сондықтан PayPal-дың ең үлкен нәтижесі компанияның 1,5 млрд долларға сатылуы ғана болмауы мүмкін.

Мүмкін, PayPal-дың Кремний алқабына қалдырған ең үлкен мұрасы кейін технология индустриясының келесі кезеңін қалыптастырған адамдар болған шығар.